My Jewels in the Palace

Archemis B. Co / Kim
11-18-1986


Ang paborito kong cartoon karakter, si ikabod bubwit, likha ng premyadong kartonista, Nonoy Marcelo. Yan ang naitala kong pangalan sa birth certificate para sa panganay ko. November 18, 1986 nun, P1500.00 pa lang sweldo ko, P750.00 ang kensinas. Sa awa ng Diyos, nagkasya naman panggastos sa isang klinika lang ng freelance midwife ang panganganak.

Nakita nung hipag ko ang birth certificate na nakalapag sa tabi ng kama ng kapapanganak kong asawa at napuna ang nakatalang pangalang "Ikabod". Hindi sya komporme at agad nagbigay ng payo na kawawa naman daw paglaki ng bata kung "Ikabod" ang pangalan. Dun kami nahimasmasan ng mga oras na yun at nataranta sa paghanap ng kapalit na pangalan.

Ang panuntunan ay dapat magsisimula sa "A" at gusto ko unique pero pangkaraniwan pakinggan. Ayaw ko ng dala-dalawang pangalan at mala-burgis ang tunog.

Gumawa kami ng maikling listahan ng mga pangalang pagpipilian, tulad ng Ariston, Artemis, Archemides, atbp., mga pangalang angkin ng mga bantog na sinaunang tao sa mundo. Naging tila salawahan ang pamimili sa panibagong pangalan, at sa gitna ng kawalan ng katiyakan, bigla naibulalas ng aking esposa: "yun na lang kayang" Archemis ba yun?", dala ng nagkabuhol-buhol na dila. Aba! ayos sa pakinig ko yun ah. Parang korupsyon ng Ariston-Artemis-Archemides. Naging unique nga. Binura namin ang "Ikabod" at pinabinyagan sa "ARCHEMIS" na me palayaw na Kim.















Alexis B. Co / aL3kZiz
11-03-1990

Lumipas ang apat na taon, dumating ang pangalawang supling. Sa pagkakataon ito, hindi pa rin tumpak na napagkasunduan ang magiging pangalan, gayung papalabas na ang bata sa sinapupunan matapos ang siyam na buwan.

Sa mga sandaling iyon, hinatid ng esposa ko ang sarili niya sa ospital at ako naman noo'y nasa Mindanao sa pagtupad sa tungkulin sa aking amo na siyang nagpapa-ikot ng aking mundo sa bisa ng minimum wage law. Sa pamamagitan ng RCPI long distance call, muling tumambad ang usapin ng magiging pangalan ng bata.

Wala talaga kaming nakursunadahan na mag-asawa sa mga nakaraang pamimili ng pangalan. At ako'y napalingon mula sa maliit na bintanang salamin ng telephone booth, natanaw ko ang nakabukas na telebisyon sa kabilang dako ng establishimento, kasalukuyang napapalaban ng boksing ang paborito kong boksingero ng Argentina na si Alexis Arguelles. Ano pa nga ba? e, di "ALEXIS" na.

Argenia B. Co / Argen
12-02-1991

Makalipas ang dalawang buwan nung laban na yun ni Alexis Arguelles, lingid sa aming kaalaman, may namumuo na naman palang buhay na paparating sa aking mag-anak. At gayun na nga, halos sumukob sa loob ng isang taon, iniluwal ang pangatlong supling. Sa sandaling ito, may lakip ng ibayong kagalakan, dahil sa dalawang magkasunod na lalaki, sa wakas, babaye ini! Hindi naging masalimuot ang pamimili ng pangalan, walang kalituhan, walang agam-agam. Pinagpilian namin ang Argentina at Armenia. At siya'y tinawag naming ARGENIA.























Arvina B. Co / Arvie
03-09-1996

Muling nagkaroon ng apat na taong agwat. Isa na namang miyembro ng pamilya ang karagdagan sa aming kaligayahan. Isang malusog at pink na pink na angelita ang aming biyayang natanggap. Animo'y inipit ang ilong at tila kudlit lamang ang bibig.

Bilang isang manlalakbay na tindero, muling nakaraos ako na di makita ang hirap na dinanas ng aking mahal na esposa sa pagluwal sa isang naglilikot na angelita. Mahabang oras ang ginugol sa pagsusumikap na maging natural born citizen ang panganganak. Umabot sa pahalang na posisyon ang bata, kung kaya't hindi naiwasan ang pagpasya ng doktor na isailalim sa hiwa ng kutsilyo ang panganganak.

May isa akong among babae na Belinda ang ngalan, Bina ang palayaw. Pag natutuwa sakin, inaalok ako mag vale, pag-inis, inis na inis talaga. Sa kanya ko nakuha ang pangalan ni ARVINA.








Adrian B. Co / Nonoy a.k.a. Palampado
04-24-2004

Sapat na ang apat. Subalit, heto, humabol pa makalipas ang pitong taon, ang sa ngayon ay sisiga-sigaan sa pamamahay namin. Ang peste ng mga kagamitan sa bahay. Hindi lamang nauubos kundi dumarami pa ang mga pigurin, baso at plato sa kababasag nito. Gayun daw talaga pag tatlo ang puyo. Kung titigan mong maigi, meron pang isang maliit na namumuong puyo sa kilay.

Ang pangalan nya ay sama-sama na naming pinagtulongang pag-usapan, kasama na ang apat naming malalaki ng anak. Hango sa ngalan ng simpatikong bida ng nauusong koreanovela nang mga araw na yun, at sa suhestyon ni Arvina, at sa pinagtiyap na kaparehang mungkahi ng isang kaibigan, siya'y tinawag naming ADRIAN. Ngayun, siya'y Principe ng Kakulitan, wala man lang ni bahid ng kabaitan tulad ng angking karakter na ipinakita ng koreanong si Adrian.












http://caramoan-kanvar.blogspot.com