Sa Sakuyang Panahon

Kadakol akong gustong isurat, mga istorya asin pangyayaring huhugoton pa sa alintataw. Magsakuya o sa ibang tawo pa man.

Gusto kong makipag-ulay sa mga suanoy na Caramoanon na matandaon asin dai nalilingaw sa mga naging akto kan saindang panahon. Maghapot, maki-regatsaran, maghimate, makipagribayan nin mga konsepto. Gusto kong an saindang mga testimonyas maging testigo asin panalmingan kan makabag-ong henerasyon.

Sa sarong banda, gusto ko man isurat maski mga bagay-bagay na bako man na gayong seryoso. Gusto ko sanang giromdomon an panahon nin paglabto sa salog. An pamisipis sa patohod na tubig asin pagrirop sa tibayong na nakakupo sa irarom kan gapo na horohararom o parting libtong. Balikan an mga aldaw nin paglook sa eskwela tanganing makapamayawas sa kadlagan, magpodo nin korombot, matunok nin layas na awot na turog-turog. Repasohon an adbenturyang nangyari, kan rubo-rubo kaming linibon nin maiisog na sugod, kawasa tinirador an saindang harong, daing hutahot an samuyang karabukab padausdos sa katarangtangan na bulod.

Kadakol pa an mga agi-agi na makapung-aw na paghorop-horopon, arog sa panahon nin pag-eskwela sa elementarya - dai ko malingwan an nutri-bun, an pinakadakulang tinapay na naheling ko kan mga panahon. An pinakamaogmang selebraysyon kan Jr. & Sr. Prom Night kan High School, asin iba pang mga tunay na salaysay kan lambang hagyanan nin buhay sa sakuyang panahon. Miski ano na sanang masayunan, isusurat ko, an karaan, mag presentamente o puturo man.

Inihong sakuyang paghingoha na tiriponon an mga ladawan asin mga estorya, nin huli sa kamaw-utan ko na ipamugtak an mga nasambit na mga restos de recuerdos sa imortal na estado, sa paagi nin pagsang-at kaining mga obras sa internet library kan kalawakan na daing kasagkuran.

Ini nanggad an sakuyang odok sa boot na pagmaw-ot. An magkaigwa nin matarom na memorya, sierto asin bakong basang-basang na pagtantos sa panahon, mahiwas asin daing kasangkuran na pagromdom. Alagad, aminado man na dai akong kabateran, para ako-un na an gabos kaya kong mahimo sa paggamit sana kan sadiring hotok. Nin huli sa makabag-ong teknolohiya sa komunikasyon, magkakaigwa nin katuparan an sakuyang kamaw-otan. Nagpupuon na ako ngunyan, sa pagpapatianod sa modernong panahon, digdi sa behikulo kong www.kanvar.multiply.com.